Lehen, marka batek ezaugarri teknikoen onuren informazioa ematen zuen bere produktuak saltzeko. Publizitateak produktua, haren erabilerak eta xehetasunak zituen ardatz.
William Ryanen esanetan, «kontakizunaren aroa» sartu gara. Momentu honetan enpresen erronka nagusia beren istorioa ahalik eta modu eraginkor eta sinesgarrienean komunikatzea da. Albo batera utzi beharra dute posizionamenduan oinarritzen den marketin tradizionala. Posizionamenduak, kontsumitzaileen beharrak asetzeko ezaugarri onenak azalduz, produktu jakin baten izena edo irudia lekurik onenean kokatzeko joera du.
Edonola ere, merkantzia ez da desagertu, baina salgaiak objektu estatusa galtzen hasi dira. Merkatuan paradigma aldaketa egon da eta eskaintzen dena produktua baino are gehiago da, esperientzia bera saltzen da. Sentsazioek hartu dute garrantzia.
Storybrandaren bitartez markak euren historia eraikitzen dute eta haien balioak ezagutzera ematen dituzte. Markek pertsona baten lekuan jartzeko gai izan behar dute. Eskaintzen diren produktuek izaera eta nortasun bat dute. Horrela, erabiltzaileengana hurbiltzen dira. Istorio sinesgarrien bidez kontsumitzaileak enpatia senti dezake.
Balio diferentziala
Proiektuak ez dira ezer ezetik hasten, asmo bat dute, gogo bat, zergati bat. Eta balio diferentzialak hori adierazten du, besteengandik ezberdintzen duena da. Asmo hori ez da diru-sarrerak eskuratzea, baizik eta produktu edo zerbitzu horren erabilera gainditzen duen zentzu sinbolikoa.
Produktu edo zerbitzuari buruz egiten den adierazpena da, zertarako balio duen ezagutzera ematen du edota zertarako den komenigarria. Erosleen beharrak zergatik asetuko dituen azaltzen ditu baita ere. Marka bat erakitzean publiko zehatz baten motibazio edo beharrei erantzuten dien produktu edo zerbitzu bat sortzen da.
